لیگ آف پارلیمنٹرینز فار القدس اینڈ فلسطین نے اعلان کیا ہے کہ وہ 10 اکتوبر کو ہونے والی ’’گلوبل ڈے آف ایکشن‘‘ یعنی ’’عالمی یوم اقدام‘‘ مہم میں باضابطہ طور پر حصہ لے گی۔ یہ فیصلہ گلوبل الائنس فار فلسطین (GAFP) کی جانب سے جاری کی گئی اپیل کے جواب میں کیا گیا ہے۔
لیگ کے سیکریٹری جنرل ڈاکٹر محمد مکرم بلعاوی نے بتایا کہ اس اقدام کا مقصد فلسطینی عوام سے اظہار یکجہتی کے لئے ہونے والی عوامی تحریکوں اور پرامن دھرنوں کو پارلیمانی اور قانون سازی کے دباؤ میں تبدیل کرنا ہے، تاکہ ان طریقۂ کار کو روکا جا سکے جو قابض قوت کو اپنے جرائم کی سزا سے بچنے میں مدد دیتے ہیں۔
بلعاوی نے بتایا کہ لیگ کی جنرل سیکریٹریٹ دنیا بھر میں موجود اپنے تمام رکن پارلیمنٹیرینز کو سرکاری خطوط اور تفصیلی یادداشتیں بھیجے گی۔ ان خطوط میں ان سے کہا جائے گا کہ وہ 9 سے 11 اکتوبر کے دوران پارلیمانی ’’موبلائزیشن ونڈو‘‘ کے موقع پر فعال طور پر حصہ لیں اور اپنے آئینی اختیارات اور ذرائع کو استعمال کریں۔
انہوں نے زور دے کر کہا کہ عوامی یکجہتی کو ایسے فیصلوں میں تبدیل کرنے کے لئے پارلیمانی اقدام سب سے مضبوط دفاعی راستہ ہے، جو قابض قوت کو الگ تھلگ کریں اور اسے حاصل استثنیٰ ختم کریں۔ انہوں نے بتایا کہ ان خطوط میں پارلیمان کے اندر کئے جانے والے ضروری اقدامات کے حوالے سے سفارشات بھی شامل ہیں۔ ان میں سب سے اہم نگرانی کے آئینی اختیارات کو فعال کرنا ہے، جس کے تحت وزرائے خارجہ اور حکومت کے سربراہان سے اسلحے کی برآمدات اور اقتصادی معاہدوں کے بارے میں براہ راست سوالات اور وضاحت طلب کی جائے گی، تاکہ حکام کو پارلیمانی ریکارڈ کا حصہ بننے والے سرکاری جوابات دینے پر مجبور کیا جا سکے۔
لیگ نے اپنے ارکان سے یہ بھی اپیل کی ہے کہ وہ ایسی قانون سازی کی تحریک کی قیادت کریں جس کا مقصد فوری طور پر اور مکمل طور پر اسلحے کی پابندی عائد کرنا، قابض قوت کے ساتھ ترجیحی تجارتی معاہدے معطل کرنا، اور حکومتوں کو بین الاقوامی عدالت انصاف اور بین الاقوامی فوجداری عدالت کے جاری کردہ فیصلوں پر مکمل عمل کرنے کا پابند بنانا ہو، تاکہ جنگی جرائم کو حاصل سفارتی تحفظ ختم کیا جا سکے۔
گلوبل الائنس فار فلسطین (GAFP) نے لیگ کو 10 اکتوبر 2026 کو ہونے والے ’’عالمی یوم اقدام‘‘ میں فعال طور پر شرکت کرنے کی باضابطہ دعوت دی تھی۔ اس کے ساتھ 9 سے 11 اکتوبر تک ہونے والی پارلیمانی موبلائزیشن ونڈو سے بھی بھرپور فائدہ اٹھانے کی اپیل کی گئی تھی۔
یہ مہم 10 اکتوبر 2026 کو ہونے والے عالمی یوم اقدام کے ساتھ شروع ہوگی اور اس کے تحت 9 سے 11 اکتوبر تک ادارہ جاتی سطح پر بھرپور سرگرمیوں کا سلسلہ جاری رہے گا۔ اس شرکت کے ذریعے لیگ کا مقصد پارلیمانوں کے کردار کو مضبوط بنانا ہے، تاکہ بڑے پیمانے پر ہونے والی عوامی سرگرمیوں اور پرامن دھرنوں کو قانون سازی اور ادارہ جاتی دباؤ میں تبدیل کیا جا سکے، عوامی خاموشی کو توڑا جا سکے اور ان طریقۂ کار کو ختم کیا جا سکے جو قابض قوت کو اپنے جرائم کی سزا سے بچتے رہنے کا موقع دیتے ہیں۔
